Сонце
як білий камін
над водом
ретяз колыше
безіменний ден
покріпил нас
порноґрафійом блискучом
з просніня
барвінкового
віщым жытьом
        Віра, Надія, Любов
        Софіі діти
        Дай Боже щесливо
        іщы ден
        єдного сонця

Мій світ
то не чуже слово
то кавальчык простору
в абсолюті
молитва
за помершы душы
якы іщы тліют в земли
зелене світло
будучым вікам
вкоріненым
в архетыпний
образ жытя

Зас я
зас они
так як в дзеркалі
дві стороны
ничыі
з простору вырваны

маестро грат
на штырі рукы
дотык шкла
холодніє на твари
я
ци они
мосты зорваны

ходме далі

yж стоіт
на горбку тота хыжка
што безпечном
про нас мала быти
крыла розпостерат
в ззеленіст
і кличе
фурт кличе
про молитву
котра може єй створити

Повторило ся тото
што николи ся не повтарят
і ріка і вода
лем рокы
все проходят
і не маме себе
лем в собі
образ свій несеме
котрий ся повторит
як станеме
проти себе

нич не речеме
бо вшытко знаме
од все

Ворожба

На долони три свічкы
Лял ся вечетри
в поломін чорнявом
…ворожылам
на пут каменистий
катуляло ся
кожде
лемківскє слово
…пішлам

Автобіографія

ци лем я надвоє
моє
твоє
Чыі імена
в нас вписаны
де моя земля
а де тота што мя родила
кілко поколінь іщы мине
підо мном
надо мном
сохнут травы

ци то лем туга
ци надія

Зачаруваны

пізно уж
білы птахы лишают землю
вірніт наша
пахне пілнічным вітром
ближше пригорний
засмученіст далеку
веретено кроків босых
в лозинах
затисний пальці на перлинці росы
то серце ночы так радіє
в жмени

Нога за ногом

в білым снігу
зас
стaє ся
час
коли неє
пятен
ани тіни
бреханя пса
ретязи бренкоту

Перша борозда протята
напрямом границ
то лем страх
пред поворотом

Сонце

Колиси..
люде ходили
на гору
до сонця ся молити
Тепер…
люде сонце продали
і думают
же легше ім жыти

Olena Duc-Fajfer is a native Lemko literary scholar, art historian, editor, poet. She is the head of the Department of Russian Literature at the Institute of East Slavonic Philology at Jagiellonian University and founder of Lemko philology at the Pedagogical University in Cracow, where she taught Lemko language, culture and literature. Between 2005 and 2014 she served as a representative for Lemkos on the Joint Commission of the Government and National and Ethnic Minorities. Her research interests include literature and ethnicity, ethnic minority literature, minority discourses, intercultural relations, the anthropology of literature, and the revitalization of endangered cultures and languages. She is the author of 250 academic publications, including the monographs Lemko Literature in the Second Half of the Nineteenth and Early Twentieth Century (Kraków 2001). She actively promotes the Lemko language and culture throughout the world.

Trafika Europe